قصتي مع ارتوريتا والجمعيه

صباحكم ومسائكم سكر وحلا أحلى من الحلا

اليوم بقص عليكم قصه خفيفه وحلوه

فياجماعة الخير اللى فيه سكر يوخر عن البدايه ويقرا النهايه ويمتع ناظريه بالصور

بهذا الشهر الفضيل فطوري عباره عن لبن وتمر وطبعا الشوربه ما أقدر أكملها

بتسألوني ليش بقول لكم العلم عند الله ما أحس بيوع وما أتسحر بس أقعد أشرب ماي

الوالده تساحل فيني إكلي أقول لها ما أقدر أحس أني طافحه تقول لي كله سوائل يابنيتي مايصير

فكنت معاهم بالصاله ولا أقول حق وخيتي شرايج نروح الجمعية

ما أشوف اللى ذيج البنيه اللي نقزت من مكانها وبققت عيونها

أرتوريتا:هو علامج بسم الله تونا شايلين الأكل نطري شوي

وحن وزن ورن على راسها وقلت لها إي لو الغريب طلب منج قمتي وماقلتي نطري

أرتوريتا: قومي لبسي فكينا من شرج يادلوعة أمج

فكانت في عيون تراقبنا من بعيد

وفجأه نسمع ذاك الصوت العالي اللي يهز البيت هز ويقول

وين على الله قررتوا وبتلبسون على وين

جان أطالعه وأبتسم وأقوله يباه بنروح الجمعية

انزين انزين روحوا الله وياكم بس المره الياية استأذنوا قبل ما تقررون

قمنا ولبسنا وعينا من الله خير وقبل مانطلع .. سؤال أبوي التقليدي عندكم فلوس ؟

أنا : اي

صبوا بانزين ديروا بالكم بالدرب الحرص واجب ومحاضره صغيره عنونه حق اختي لاتدوسين وتصورج الكاميرا ولاتطوفين الصفرا على أبو ريض على ماتصير حمرا

طبعا هذي المحاضره والسبب إن اختي أرتورو مشهوره بسالفة المخالفات

وأمي بس تبي فيمتو وسانكويك وباجي اخواني مايبون شي

مايدرون أنهم يوفرون

وركبنا السياره وتوجهنا إلى الجمعية ودار هالحوار بيني وبين ارتوريتا

أقول تنزلين

ارتوريتا : لأ مالي خلق

كيفج تبين شي

أرتوريتا : لأ مابي مشكوره

دخلت الجمعيه وأول مادخلت سيده رحت صوب عشقي وغرامي

الككـــــاو

وبس آخذ وأحط بهالعربانه عقب رحت صوب العصير شريت منتج كويتي واللى أهو

كي دي دي بعدين شريت لبن واغراض أمي مانسيتهم

وشريت بطاط الحجم الكبير تسألوني ليش أقول لكم مادري

وشريت كرواسون وبسكوت وكيك وشكثر أشياء

الناس تطالعني ويقولون شفيها هذي رمضان وإهيه ككاو وحلاو وعلوج

ولا يرن تلفوني

ألووووو

أرتوريتا :إنتي وينج شدعوه عليج كله فليك بتشترينه وفيمتو وسانكويك وعلج شفيج طولتي

كاني قاعده أحاسب ياوخيتي تبين شي

أرتورو:لأ

متأكده ترى تندمين

أرتوريتا : مابي بس يله زتج ترى عندنا مشوار ثاني

وأنا أم الحكم علامج إنتي ماتدرين بالسرعه الندامه والعيله من الشيطان

أرتورو: أقول قلبي ويهج ويله تعالي بس وإنتي يايه لاتدعمج سياره وأبتلش فيج

إنزين خليني أحاسب

وصل الحساب وأبطل البوك وأطلع فئه نقديه ويردلي خرده ومعاهم نص وجم دينار

عاد شغلوا مخكم وقولوا جم دفعت بالجمعية صج قبل لا انسى الشي الأخير اللي شريته

هذا الدايت علشان تعرفون أني أهتم بالصحه

وصلت السياره

ونحط الأغراض بالسياره وبوقفتي بره إتييني وحده لابسه عبايه لونها رمادي ومبين توها مضروبه أوتي وحجاب أسود وحاطه كريم أساس وتقولي الله يرزقج ويحفظج أنا مسكينه عندي عيال وموال طويل عريض

قلت لها يعني إنتي مسكينه

جان اطالعني بنظره حست انها شوي وتقولي الشره علي قلت لج هالنشيده

فقلت ببطل بوكي واللى يطلع بيدي بعطيج ياه وسحبت من البوك مبلغ وقدره واهوه نفس المبلغ اللى دفعته بالجمعيه بس نوط كامل وماكو خرده

ركبت السياره وارتورووو تقولي إنتي خامه الجمعية ويايه
قلت لها حقي بروحي محد يشاركني باللي شريته بس عبود لأن عيد ميلاده اليوم
وصلنا الحين العديليه وشرينا بوظه حق أمي العزيزه وطبعا ارتورو اللى نزلت وخذت بوكي معاها

ركبت السياره شيووووووووم فشلتيييني شنو هذا صفر بوكج مو توج ساحبه أربعين وينهم؟!! بس خرده وجم دينار بالبوك

تبين تقنعيني انج شاريه بالفلوس كلهم وقعدت تقرق على راسي

جان اقول لها لأ الفقيره اللى قبل شوي قلت لها اللى بيطلع بيدي بعطيج ياه وطلعت العشرين وعطيتها مافيها شي ورمضان كريم ياوخيتي وعطتني محااااضره ليمه وصلنا البيت
وتخيلوا هالأغراض من يوم الخميس بالثلاجه اللهم انوكلوا كرواسونتين وشربت آنا اللبن
تخيلواا زفوني وصارت قصه عالأشياء اللى شريتهم فقلت لهم بقعد عند الجمعية وببيع أرخص من السعر الأصلي

ياجماعة الخير أنصحكم نصيحه السكر ذابح اهالينا وعيالنا فديروا بالكم من اللقيمات

على فكره امي ادلع اختى وتقول لها ارتوروا وأرتوريتا ليش مادري يمكن لان قبل كنا نطالع افلام مدبلجه وايد

ولا تسألوني شدلعني فيه ماماتي لأنه سر

بغيت أقول لكم شغله اختي العزيزه كانت مسويه برد الاوريو وآنا كنت مسويه حديقة الحيوانات اقصد لقيمات

فشوفوا عمي شنو طاح بايده وشنو هالشكل ياترى بالاستعانه بفتافيت الاوريو

اتمنى لكم صوم مقبول ويارب الكل يشفى من السكر والله يبعد عنا وعنكم الامراض يارب
قبل لا انسى طفوا لابتوباتكم وكمبيوتراتكم لأن الترشيد موجود خلف الجيس