العين التي لا تنام

يسعدلي نهاركم ومسائكم إخواني وأخواتي البلوقرزيه الكرام

اليوم يايه وكلي أمل أنكم تسمعوني

مثل ما إنتو عارفين الشرطه في خدمة الشعب وهالشي محد يختلف عليه

واللي يبي دليل على صدق كلامي يسمع سالفتي علشان يتأكد من صحة مقولتي

يوم الخميس معزومين على عرس ومثل ما إنتو عارفين عروسنا تنتهي بساعات متأخره من الليل فصارت الساعة وحده

فشلنا قشنا وعطينا السكيورتي كرت السيارة وصعدنا وتوجهنا الى منطقتنا المصونه

واحنا بالطريج شفنا شباب راكبين بقيات ويوم شافونا قاموا يستعرضون ويزعجونا وأحنا من جهتنا مطنشين فيهم ومكملين المسير

وتمر سيارة الشرطه ويطلع ذاك الصوت العجيب طوط طوط وقفوا ياشباب وصفطوا عاليمين

وطبعا عمك أصمخ وينحاشون وهذي حالتهم

جك بوووووم

فلشر ورانا وتردد عباره اصفط عاليمين ياراعي الهوندا

وبينا وبين بعض هذا من صجه وقفنا على اليمين

ويترجل ذلك الشاب وبخطواته البطيئه وقال نزلي الجام ويطل طله سريعه بداخل السياره ويقول انتو اربعه طبعا هالعباره قالها بعد ما بقق عيونه وخز كل وحده فينا

فقالتله امي خير اخوي ليش موقفنا

قال بطايقكم اربعتكم

نظرات تعجب واستغراب بهاللحظه

اختى عطته ليسنها ومحد فينا يايب بطاقته

امي قالتله ليش بطايقنا انت ليش موقفنا اذا احد شافنا شيقول والحين الوقت متأخر ياوليدي واحنا مومسوين شي غلط ومومخالفين ليش توقفنا

فرد علينا وقال شوفوا انتو من وين يايين بعدين كلموني

دفتر السياره وينه واخذ الليسن والدفتر وركب الدوريه

وبعد لطعه تقريبا ربع ساعه يمشي الاخ على وحده ونص

ويقول هاج

امي اهني عصبت وقالتله انت ترضى احد يوقف اهلك بوقت متأخر من غير سبب

فرد ليش معصبه بدال ماتشكريني لانى احميج واسهر على راحتكم تعصبين

قالتله اي راحه تتحجى عنها

فرد احميج من البقيات لانهم مزعجينكم

فردت عليه المفروض توقفهم اهمه مو احنا

فقال لها اذا بوقفه يا ادعمه واموته يا اوقفكم

وركب سيارته وداااااااااس وشفط جدامنا وراح

((وهذا ان دل فانه يدل على تصرف حضاري بحت من رجل الشرطه))

موقف ثاني

حاميها حراميهااااا

اذكر موقف من المواقف مره مع رفيجاتي طالعه

فوقفنا شرطي وقال بخالفكم لانكم مولابسين حزام الامان

فرفيجتي قالتله ان شاءالله ألبسه

فقال ماراح اخالفج اذا خذت رقمي اللى قاعده ورى

فردت عليه يعطيك العافيه اخوي وخالفني

طبعا وايد سوالف غريبه وعجيبه بس اللي يقهر صج

ان الشرطه المفروض انهم يحمون الشعب مو يستغلون هالمهنه بالشي الشين والمسيئ للزي اللي يلبسه

اخواني واخواتي

هناك البعض يستغل مهنته لاغراض شخصيه وهذا الشيئ للاسف يسيئ لنا ومااعتقد ان في احد يرضاها

عذرا ولكن

بعض رجال الشرطه بخدمة مصالحهم