وقع مالم يكن بالحسبان

الغيره واللي تسويها
يا ترى الغيرة تخليك تذبح تقتل بس تاكل وتقطع الجسم حته حته ده ممكن برضو
الغيره موبس موجوده عند بني البشر حتى عند الحيوانات والطيور

اقول لكم وبكل صراحة ايييييييي الغيره تسوي كل شي
تقولون لي شلون بقول لكم سمعوا القصة اللي صارت من الأول لي الآخر

الحدث بلش يوم الاثنين مرت حمدانوه (الكروانه) رازه ويها ومقتحمه قفص الكاسكو اللي طفارته احد يدش عليه بدون استئذان هذا سبب
والسبب الثاني والاهم اللي كلنا بالبيت ملاحظينه غيرته الشديده علي نثيته كاكو طبعا الحبيب ما يبي احد يحاجيها او يوكلها او حتي يكلمها يموت من الحره وسلاحه السريع اهوه الهجوم والعض صج مجرم
خلونا نكمل

الحبيب من شاف الكروانه ياها مفتلت والشر وياه عطاها عالخفيف جم عضه اللي خلاها بدمانها ما تقدر تتحرك
البطل حسون (أخوى)من شاف وضع التكفخ والطق زف الكاسكو
واخذ الكروانه وحطها بقفصها وخلاها عندنا بالصاله وسكر باب القفص عدل علشان الكاسكو لا يبطل الباب عليها
على فكره تري طيورنا عادي يفتحون بروحهم قفاصتهم يتمشون بس ردتهم للقفص اوامر من الزعيم كاسكو يلحقهم ويعضهم فمن يدشون القفص اهوه يسكر الباب وراهم وينطر جذيه بو جم ثانيه طبعا ليتاكد انهم ما يفجون القفص مره ثانيه
المهم كاسكونا حاقد عليها وكل شوي ايي الصاله ويحاول انه يعضها بس موقادر لان احنا له بالمرصاد واقفين
فبعد ما طابت جروحها الفقيره شلناها ورديناها حق حمدانو وباجي الطيور ربعها

كنت قاعده ولاهيه باللابتوب اشوف امى يايتنى ودايسه 180 شيوم ما تسمعين صوت الطيور انتى ماسمعتى صراخ كروانه قلت لها لأ ليش قالتلى تعالى معاي انشوف اشفيها وانا وامي ركض
وانصدمت من اللى شفته الكاسكو مبطل القفص وقارم الكروانه ومطلع عينها وقارم ريلها وقارم جناحها وعاضها صوب قلبها واهي تنزف من كل صوب عورت قلبي وامي منصدمه وتاشر لي وتقول لي شوفي شيوم شوفي كل مكان عاضها
وشوي وما اشوف الا الكاسكو يمر يمي بكل وقاحته ويقولى هلا والله هلا والله بصوته الخشن جنه مو مسوي شي يعني برئ بسلامته
جان اقوله كاسكو يا حيوان ليش تسوي جذي وافلعه بالسليبر اللى لابسته عزكم الله

ويقولى كاسكووو ليش ها ليش وناديت اللي بالبيت كلهم

وكل واحد فيهم عطه الكاسكو المجسوم من الطق اخوي يركض وراه ويشوته

واخوي الثاني فصخ الجوتي عزكم الله وطاح فيه طق وسب واهوه من الخرعه ما يعرف وين ينحاش ووين يروح وكان يركض ويتحلطم ويقول حسن عبدالله بس يبه ليش ها

وكل الكلام اللي حافظه قاله
و باعتقادي اذا دروا جمعية الرفق بالحيوان عنا جان صارت قضيه ومحكمه وبلاوي متلتله
والمجرم لازم يترك اثر لجريمته فالصور تشهد على الجريمه والحدث اللى صار فمنقاره عليه دم و ريش الضحيه

هذا كوم واختى ارتوريتااااا كوم ثاني يومتها عندها معرض وتوها راده البيت فقاعده تراوينا الصور وتسولف وتضحك وما تدري عن سالفة طيرها وانا كلش مبين من ويهي الضيجه وطبعا اهي فاهمتنى عدل وتدري اذا في شي من ويهي يبين قالتلى شفيج شيوم شنو صاير فقلت لها بدلي واعلمج
دشينا الدار ما تكلمت بس راويتها صور طيرها اللي بتلفوني حرام بعد عمري تضايقت وايد وبجت وما لاحظت عليها أي تعليق

كل اللي سوته
شالت طيرها وودعت مرت حمدانوه ودفنتها بمقبرة الطيور اللى مسويتها حق اطيورها بالحديقه مع اخوى وتمت حزينه تكسر الخاطر جم يوم

اي صج ترى ما قلت لكم عن الكاسكو بالايام اللي طافت كان منخش وجنه حاس انه مسوي شي غلط وعاقبوه اخواني وفرقوه عن مرته وما عطوه اكل

بقول لكم مقتطفات عن الطيور والحيوانات اللى عندنا مع انى اكرهم بس كل بيتنا يحبون تربية الطيور

حمدان اسم الكروان مادري ليش سموه حمدان وعندنا قرابة ال6 سنين اذا مو اكثر اختى ربته من كان فرخ صغير
مرت حمدان كروانه بس همها تاكل وتتليقف وتروح حق الكاسكو شكلها معجبه فيه ويابوها بدال اللى داست امى عليها بالغلط وهذي هم قصتها قصه
البيبيه بيبي متوه من كان فرخ ربته وخيتي ولي الحين عايش بس مليغ مرافج مرت حمدان وطيور الحب والطيور الباجيه
كاكو مرت كاسكونا المجرم هذي كانت تغازل كاسكو ثاني عندنا وبعدين مشاها المجرم سيده واحنا ودينا الكاسكو الثاني المزرعه علشان نفتك من صراخه

يوم يكفخه المجرم
المجرم الكاسكوووو صاحب الحدث هذا عندنا من سنيييييييين ومايحب احد يحطه بقفص يغار من كل شي ويحب يتجسس ويتسمع ويقول كل اللى يسمعه اذكر مره مكالمه بين يدتي وابوي كامله قالها والصبح اهو يقعد الصبيان ويقلد ابوي يوم يقول حسن عبدالله قوموا يبه ترى مصختوها ومايصير جذي وبعد لمن يقول وين الفوووووووووطه ووايد حجي شبقول وشبخلي
المصيبه انه حافظ كل اسامي اللى بالبيت الا انا بس يقلدني يوم اقوله كاسكو ليش ها ليش صج حيوان

وغرامه شي اسمه جالكسي بندق وبطاط نايس والجاي اللى فيه شكر اذا موحلو مايشربه يحب يكسر حب ويحب بسكوت دايجستف ويحب الكوفي اخلصكم يحب كل شئ ناكله نحيس
مرت حمدانوه سابقا الأولى تحب اختى بشكل موطبيعي ومره اختى قاعده وعلى جتفها مرت حمدان اخوي يه وماسك التيشيرت ويهوش بالهوا علشان اختى تكويها له عشتوو اخوي مايحب الخدامه تحط ايدها على اغراضه

المهم هالكروانه علبالها بيتناجر مع اختى فطارت عليه بطريقه هجوميه وبتدافع عن ارتوريتا وانصدمنا من الموقف واللى كان مخليني احب هالطيره صج ان اختى لمن تصلي او أي احد تروح يمه وتصلي وياه

ارتوريتا وامي وابوي وعمي واخوي قاعدين بالصاله يسولفون ويت الحزينه تفرح ما لأت لهاش مطرح تمشت عالارض علشان تصعد عند اختي وامي بتمر موقادره شوي جذي وقفت كروانه وامي تحركت ويت مرت حمدان بسرعه علشان تعض امي وبهاللحظه امى رجعت خطوه للخلف وداست على الضحيه مرت حمدان وصرخـــــه من اختى وافترت هالكروانه وطاحت بالنص يم ريل اختى وبجت بجي فراضاها عمي بوحده يديده اللي ذبحها المجرم