هدووووء حنصور

تحديث بخصوص بنت الجسار

في ظل الأوضاع الراهنة ومع كل اللي قاعد يصير بديرتنا الحبيبة الكويت

من لوية وإزدحام وعمليات تخريبية

إلا أني جمعت حصيلة لا بأس بها من آراء وأقوال ونقدر نقول كلمات من المرشحين من بعد هالموقف اللي صارلي

ياجماعة الخير كنت قاعدة بالصالة مع أبوي فحطينا قناة من القنوات ولا أشوف عايشه الرشيد تتكلم وبصراحه عجبني كلامها يمكن طريقتها بالتحدث شدتنى وكلامها حسيته سليم

فقلت يباه كل من هب ودب بينزل نفسه عيل بعد 8 سنين برشح نفسي

فقالي خير انشالله بمعنى أدق يعني غسلي إيدج

فيت إختي وقالت حق الوالد الله يحفظه أنها بتغطي الملتقى اللي مسويته نجلاء النقي فقلت لها منو بيحضر فعددت المستضيفين ومن ضمنهم عايشه فقلت لها بسري معاااج ياوخيتي قالتلى تعال فرحنا عمارة الأولى اللي موقعها جبال شوبيز تقريبا

وأتركم مع اللي صار بالضبط

تأخير أحد الأخوات اللي مستضيفتهم نجلاء

الملتقى بدأ الساعه 8 وربع تقريبا مع ان المفروض يبدي الساعه 7ونص

فما ادرى باجر بالمجلس لي فازوا بيتموون جذي بمواعيدهم الخربوطيه ومافي أي نوع من الالتزام بالمواعيد

تراااا ترااااااااااااااا

العدد إكتمل وإعتذار المرشحه ذكرى الرشيدي من الحضور جاء قبل الموعد بجم ساعه مثل ماذكرت الاخت عايشه

وخلونا نشوووووووووووووف

المصيبه والطامة الكبرى

1
2

3

هدووووووووء

حنصور

طبعا في جم قناة البث مباشر وجم قناة لأ

رحبت بالحضور الاخت نجلاء ومن ثم عطت المايك لعايشه وشوفوا شصار

اول مابدت عايشه بالكلام وجهت كلامها للاخت نجلاء شلون باجر بتكونون ملتزمين بالمجلس وانتو الحين مافيكم من الدقه ولا الالتزام بالوقت وتقاطعها نجلاء بنبرة مرتفعه لا عايشه مالي شغل الاخت وتأشر عليها من جمهورية مصر واهي اللي أخرتنا

وترد الضيفه من الجمهوريه اسفه اول مره ايي الكويت وماادل شي

وبعدها أعلنت عايشه انسحابها وقالت بتسوي حملة المنار تفضح فيها الكل وبتذكر الاسماء وراحت وخذت قلبي معاها وطبعا ذكرت شيئ من اللاشيئ من التهديدات اللي هددوها وأنهم بيفلعونها بطابوقه وغيرها من التهديدات

مقتطف آخر وبقت كلمة مقتطف من أحد المدونين وإذا عرف نفسه لايفضحني

أثناء كلمة أحد المرشحات الاخت نجلاء تأشر وتكلم المصورين واللى تقوله اي اي بعدين وتسلم على هذا وذاك مادري ليش

الحين إذا إهيه ماحترمت اللى قاعده يمها وتتكلم وبالها مو معاها شلون باجر لي راحت المجلس والكلام مو بس عنها حتى عن الباجيين مايعرفون شي اسمه انصات كل وحده بوادي وعالم ثاني

وخلص الملتقى

الحين موصح يقولون صاحب بالين جذاب انزين قعدت الاخت الفاضله نجلاء وقاعدين يسوون معاها مقابله لاحدى الصحف

جك بووووووووم طنشت بالريال وقالت إي إي هذي بنتي لاعبة باليه وفنانه تشكيليه الحين وين عقلج ووين رحتي يامرشحتنا

رحنا وسرينا بعدها بجم يوم بجمعية المحاميين حضرنا وكان في عدد من الاخوه المحاضرين وانتهى النقاش

والحين دور اسألت الجمهور فعطوا المايك لاحدى الاخوات وقالت معاكم الشاعرة المرشحه نوال المقحط مادرى المقيحط

اللى بعرفه الشاعره شكو وشنو موقع هالكلمة من الاعراب فهل ياترى بتشعر اذا فازت بالمجلس

وتم الاتصال من جديد ودعوتنا لحضور مناظره لعدد من المرشحات ورحنا ونفس اللي صار مع ملتقى نجلاء تأخير المرشحات وفي منهم مابلغوا عن عدم مقدرتهم على الحضور وفي اللي اعتذروا وفي اللي تأخروا بس المهم انهم حضروا

وحده تتكلم وتتكلم وجك بوم تقول لها كوثر الجوعان خلص وقتج

فتتدوده المرشحه بنت الشطي وتضيع وتدور بالاوراق وين وصلت ماهي عارفه وقامت تقط خيط وخيط وعليه عليها قطعت كوثر حبل أفكارها فبالمجلس شبيصير وياها ياترى

الثانيه واللي اهيه الاخت ناديه العلي من أول ماخذت المايك قالت آآآآ و آآآآآأأأأأأأ وآآآآ حزتها تذكرت اغنيه آآئآآئه وبس خلصت ماقالت شي مفيد كلش

والفاضله طيبه الابراهيم متحدثه باللغه العربيه الفصحي وهذا شي مميز ولردائة المايكات وكل شوي يطلع صوت يبط الاذن والحبيبه قاعده تتكلم فجأه قالت ماهذاااا

طبعا ماانسى انها تبي الكويت تصير دوله مدنيه وتفصل الدين عن الدوله

الثالثه نوال مع انها يت بوقت متأخر الا انها خلت الناس يضحكون يمكن اسلوبها مضحك وقالت احنا جيلنا جيل المتان وماكو اكل صحي ويابت سالفة عيالها انهم يدرسون بمدرسه انجليزيه فطلعتهم ودخلتهم حكومه وبعدين يوها وقالوا لها ماما بليز ردينا الانقلش سكول فقالت لهم ليش ياماما فقالوا طقونا وحماماتهم وصخه والى آخره

وقالت الجنسيات الاخرى ياخذون معاش على ولا شي لأن مدرسين الالعاب يقعدون اليهال ومايخلونهم يلعبون رياضه علشان جذي جيلنا جيل سمنه ومتن

وهم يابت سالفة الريال اللي يتزوج خدامته ويطرد مرته بره البيت

وهذيله من القضايا اللى بتناقشهم

والحين يه وقتج ياكوثر طشريهم بالاسئله

واهي تسأل ولا أشوف هالمرشحه الاموره بنت العلي تشيل قشها وتنحاش من غير لا احم ولا دستور وراحت ولابلغت اعتذارها ولا هم يحزنون

وهذا شي حلو يعني لي فازت بنص الجلسه بتشلع وتقب

وياخلف يادميثير حلو انك تستضيف ماما انيسه وتقول اجمل العبارات لزوجتك وتخليها توقف يمك وعرفت تختار المواضيع اللى بتتكلم عنها لي فزت وكلها امور تتعلق بالمرأه وبصراحه كلامك سليم

أعتذر نظرا للحالة الجوية من غبار واعاصير فالوالد منعنا من الطلعه يوم الخميس فمارحت جمعية المحامين

بالشاميه التقينا ببنت الجسار وكانت خدمة السيارات زاهبه عند الباب والشاورما والبوفيه بالخارج وبالنسبه لمحاضرتها فهي حلوه وخفيفه وحضروا عدد من المرشحات واللي يضحك ان عريفة الحفل بدال ماتقول سلوى الجسار قالت سعاد الجسار وفاطمه الجسار وهذا يدل على شنو يابلوقرزيه اترك هالشي لكم وطبعا الاخت نجلاء قالت مداخله والعريفه بدورها اشكرت الاخت خنساء النقي واللي اهي نجلاء

اهنيج على اختيارج الموفق يابنت الجسار بالنسبه للعريفه

والأغلبيه بيناقشون مواضيع العنوسه وزواج الرجال من الاجانب والسمنه والطلاق

والخدم

وأخيرا وليس آخرا

مع احترامي للكل بس هذا اللي شفته بعيني وسمعته باذني فلكم كل الشكر وموفقين يارب

اخيرا

سؤال للكل

لو انت عضو بمجلس الأمه شنو القضيه اللي بتناقشها ياترى