قطرات ناريه

البوست اليوم مختلف اهو حلم حلمت فيه ومثل ما يقولون اللهم اجعله خير

وطبعا انتوا حبايبي وناس غاليين علي فقلت اقوله لكم

كنت نايمه حالي حال خلق الله

حلمت حلم يخرع لدرجه قعدت من النوم أفكر فيه طول الوقت لاني بصراحه تعبت منه

ومادري شنو تفسيره

اندعست بفراشي الغالي كالعاده الساعه عشر

لان وراي دوام وانا من الناس اللي شعارها نام بكير تصحي بكير

ورحت بسابع نومه

الــحــلـم

كنت قاعده بمكان ما اعرفه غريب وفيه مباني وعمارات وشفت ناس وايد بالمكان هذا في منهم أاللي اعرفه وفي منهم اللي ما أعرفه وفي ويوه اعرفها بس من اطالعها تتحول الويوه وتتغير حق ويوه ناس ثانيه ما أعرفها

و كانت السما قاعده تمطروايد وتقطر قطرات كبيره بس لمن طالعت المطرانصدمت شفت انه مو مطراللي قاعد ينزل علي الارض اللي ينزل نار شكله يخرع ووايد ينزل والناس تركض خايفه منه وانا بعد خفت جان اركض وياهم ووين ما أروح كله نار حوالينا وزاد المطرلدرجه أن الأرض انحفرت وصارت حفر كبيره من المطر الناري اللي ينزل علي الأرض واي جنها أهوال يوم القيامه

وعاد اللي أذكره كان فيه مبني شاب ضو والنار عاليه وواضحه وجنه المبني يذوب شوي شوي وينزل علي الارض وشكله يخرع العالم

والكل يركض وبعد اشوف ناس وايد قاعده تحترق وآنا ميته خوف من اللي اشوفه أصارخ وما ادري شسوي وما أبي شي يحوشني او يحوش الناس اللي أحبهم وكنت افكر اشلون أنقذ نفسي وانقذ اللي أحبهم من المطر اللي ينزل نار علي روسنا

والدنيا كانت صفره على برتقاليه والمطر الناري يزيد ويخرع وكنت حزتها أشوف بعيوني الناس يركضون واللي يحترق واللي يطيح علي الأرض والحفر اكثرت وشكلها يخرع

وفـجــــأه

بهالنورالعجيب اللي نور المكان وبعرف من وين يه وشنو اهوه وكل ماله النور يجرب صوبي ما ادري اشلون ياني إحساس بأنه هذا نور ربي

ايه امبلي اهو اهوه ربي وانا اطالع النور وما ابالغ والله العظيم سمعت صوت هادي يطلع من وسط النوريكلمني صوت فيه حنان وراحه ويطمني وحزتها ياني الاحساس ان اللي يكلمني الله سبحانه

وقالي بذاك الصوت اللي يريح ويطمن ويخفف هول الصدمه والخرعة

شفيج ليش تصرخين شنو تبين

قلت له أبي أنقذ الناس واللي أحبهم مابي يصير فيهم شي والنار تقطر بقوه

حزتها قالي بصوت هادي روحي قوليلهم الله يقول لكم قولوا استغفرالله

قلت له إذا قالوا استغفرالله ماراح يحوشهم شي وماراح يصير فيهم شي

فقالي قوليلهم قولوا

استغفرالله

استغفر الله

استغفر الله

فركضت وشفت ناس أعرفهم وقلت لهم قولوا استغفرالله

وآنا قاعده أقول إستغفرالله قطرات النار اللى قبل ما تنزل بشوي وتحوشني تصير رماد وتطيح على الأرض والرماد ماحاشني

والقطره الناريه اللي جريب وتنزل علي قاعده تصعد للسما فقمت استغفر واستغفر بصوت عالي

ومن كثرالاستغفارالغيمه اللي فوقي قاعده تمشي وتروح عني بعيد

وصرت انادي الناس وأقول قولوا استغفرالله فمنهم من كان يردد معاي ويستغفر

وفيه ناس تسمع صراخي وانا اقول لهم استغفروا وما اسكت اصارخ استغفروا بس

طنشوني مع أنهم إسمعوني قهروني واشوفهم جدامي يحترقون فخفت وايد وايد جان افز من الخرعه علي اللي طنشوني واحترقوا وعلى ذيج الهزه الناريه فزيت وقعدت من النوم

ومادري شنو يعني هالحلم

إذا عرفتوا تفسيره قولولي لأن صج شاغلني من يوم الخميس

ياإخواني وأخواتي البلوقرزيه

أمي قالتلي قولي حق اللي تحبينهم يستغفرون الله

وآنا أحبكم فاستغفروا الله